رحمتوں کی ہے برسات رمضان میں

رمضان المبارک کی برکتوں کے نام

نتیجہ فکر: قسمت سکندرپوری

ہوگی    آسان   ہر   بات    رمضان  میں 

لاکھ  مشکل  ہوں  حالات  رمضان میں

سب  گناہوں  کے  فضلات  رمضان میں

پھینک   دیں گے  مسامات رمضان میں 

ماتقدم   کا   بھی   حفظ   کرتے     رہو

اور     تلافْئ   ما فات      رمضان میں

خیر   خواہی  کے  جتنے   سوالات تھے

سب    نے   پائے   جوابات رمضان میں

کہدو    مردود    ملعون    ابلیس   سے 

دیکھ   لے  اپنی   اوقات   رمضان میں 

پھول  بنجر  زمینوں    پہ   اگنے   لگے

پاکے رحمت  کی   برسات رمضان میں 

مسجدوں   کی   چٹائی  پہ    آئے نظر 

رِند گان      خَر ا با ت     رمضان میں

جس  کو ..قرآن ..کہتا  ہے  سارا جہاں 

رب نےبخشی وہ سوغات رمضان میں

ہنس  کے روزے  کی تکمیل ہو اور پھر

رو کے    مانگو    مناجات رمضان میں

اپنے رب کی اطاعت میں کھو جاؤ تم

چھوڑ   کر  سب  خرافات رمضان میں 

پھر دے پھیر دے اے خدا    پھیر دے 

ہم   فقیروں  کے   حالات رمضان میں 

دفع ِ شر  اور  دعا  کے  لئے  ہی  اٹھیں 

جب بھی اُٹّھیں مرےہات رمضان میں 

اک نہیں  دو نہیں  شہر ِدل  میں اٹھے 

سیکڑوں       انقلابات    رمضان   میں 

صرف ہنستے  نہیں شہر   کے بام و در 

مسکراتے ہیں    دیہات    رمضان میں 

اوڑھ  لیتے ہیں  انصاف  کی   چادریں 

ظلم   کے   سارے   آلات  رمضان میں 

فاطمہ  عائشہ  اور  خدیجہ  کی    ہے  

رحلت ِ  حسرت   آیات    رمضان میں 

دست زہراء سے پیارے حسن کی ملی

ہم  غلاموں  کو  خیرات رمضان میں 

بدر  میں  تین  سو تیرہ  اصحاب  نے 

بارہ سو  کو ہے دی مات رمضان میں 

پی کے  جام ِ شہادت  علی  کو   ملے 

جو  بچے  تھے  کمالات  رمضان میں 

زحمتوں کے گلے خشک ہو جائیں گے

رحمتوں کی ہے برسات رمضان میں

ہم .شبِ قدر. کہتےہیں جس رات کو 

.ہاتھ آتی ہے.  وہ  رات .رمضان میں 

خیروبرکت کے دریا میں گم ہو گئیں

دل کی ساری  کدورات  رمضان میں 

ہوں مسلسل   سماعت  کی  دہلیز  پر 

نعت ِ سرور  کے   نغمات رمضان میں 

کاش  اہل ِ سنن بھول  جائیں  سبھی 

آپسی     ا ختلا فا ت     رمضان میں 

کاش قسمت کی آنکھوں کاسرمہ بنیں 

شہر ِ طیبہ   کے   ذرّات   رمضان میں